2. júlí 2008

Arnarstapahöfn flaggar Bláfánanum

Sunnudaginn 29. júní var Bláfáninn dreginn að húni við Arnarstapahöfn. Arnarstapahöfn er í hópi fjögurra umsækjanda sem hlutu náð fyrir augum alþjóðlegar dómnefndar, af þeim eru tvær hafnir sem koma nýjar í hópinn, Arnarstapahöfn og Suðureyrarhöfn en fyrir eru hafnirnar í Stykkishólmi og Borgarfirði Eystri.

Bláfáninn er alþjóðleg viðurkenning sem veitt er rekstraraðilum baðstranda og smábátahafna, fyrir góða umhverfisstjórnun.  Fáninn segir til um að umhverfi Bláfána-svæðis sé snyrtilegt, góð aðstaða sé fyrir hendi til að flokka úrgang, að lögð sé áhersla á öryggismál og að upplýsingar séu aðgengilegar um náttúru svæðisins. Foundation for Enviromental Education halda utan um Bláfánaverkefnið sem á Íslandi er hýst af Landvernd.

Kristinn Jónasson bæjarstjóri Snæfellsbæ og Sigrún Pálsdóttir frá Landvernd.

Reimar Karlsson hafnarvörður dregur Bláfánann að húni.

9. júní 2008

Ísland fyrst í Evrópu

Í gær, 8. júní, tóku sveitarfélögin fimm á Snæfellsnesi og Þjóðgarðurinn Snæfellsjökull á móti skjölum til staðfestingar því að hafa hlotið umhverfisvottun frá Green Globe vottunarsamtökunum. Viðstaddir hátíðlega athöfn í Fjölbrautaskóla Snæfellinga í Grundarfirði voru m.a. forseti Íslands, Ólafur Ragnar Grímsson, forseti Alþingis og 1. þingmaður Norðvesturkjördæmis, Sturla Böðvarsson, þingmenn, sveitarstjórnafólk og fjöldi annarra gesta. Ísland getur þar með státað sig af því að vera fyrsta landið í Evrópu með umhverfisvottuð samfélög en fram til þessa hefur aðeins þremur öðrum samfélögum í heiminum tekist að ná vottun.

Green Globe eru einu vottunarsamtökin sem votta starfsemi heilla samfélaga. Viðmið og staðlar þeirra byggja á sömu hugmyndafræði og Staðardagskrá 21 og kemur Green Globe vinna sveitarfélaganna á Snæfellsnesi því í stað Staðardagskrárvinnu þeirra. Með því að ganga inn í vottunarferli Green Globe hefur Snæfellsnes þó stigið skrefinu lengra, þar sem umhverfisvinnan er nú reglulega metin af óháðum þriðja aðila.

Fjölmargir hafa lagt hönd á plóg til að stíga þetta mikilvæga skref í sögu umhverfismála á Íslandi. Vottunarverkefnið hófst formlega árið 2003 fyrir tilstilli þeirra hjóna Guðlaugs heitins og Guðrúnar Bergmann, sem unnu ötullega að verkefninu frá upphafi, og hefur sömuleiðis notið ómetanlegrar ráðgjafar Stefáns Gíslasonar, umhverfisstjórnunarfræðings hjá Umís í Borgarnesi. Starfmenn Náttúrustofu Vesturlands hafa tekið þátt í stefnumótun og stjórn verkefnisins nánast frá upphafi og starfsmaður þess, Þórunn Sigþórsdóttir, er jafnframt starfsmaður Náttúrustofunnar. Einnig hafa sveitarstjórar og sveitarstjórnir á Snæfellsnesi sýnt mikla framsýni með þátttöku í verkefninu og er þá ógetið fjölda annarra sem stuðlað hafa að framgangi þess.

Framsögumenn og nokkrir aðstandendur verkefnisins. Efri röð frá vinstri: Benedikt Benediktsson oddviti Helgafellssveitar, Kristinn Jónasson bæjarstjóri Snæfellsbæjar, Guðrún Bergmann frumkvöðull, Róbert A. Stefánsson formaður Framkvæmdaráðs Snæfellsness sem undirbúið hefur vottunina og forstöðumaður Náttúrustofu Vesturlands og Kjartan Bollason frá Háskólanum á Hólum, úttektaraðili Green Globe á Íslandi. Neðri röð frá vinstri: Eggert Kjartansson oddviti Eyja- og Miklaholtshrepps, Guðbjörg Gunnarsdóttir þjóðgarðsvörður Þjóðgarðsins Snæfellsjökuls, Erla Friðriksdóttir bæjarstjóri Stykkishólmsbæjar, Ólafur Ragnar Grímsson forseti Íslands, Sturla Böðvarsson forseti Alþingis, Guðmundur Ingi Gunnlaugsson bæjarstjóri Grundarfjarðarbæjar og Þórunn Sigþórsdóttir umhverfisfulltrúi sveitarfélaganna á Snæfellsnesi.

Forseti Íslands, Ólafur Ragnar Grímsson, setti í ræðu sinni vottun Snæfellsness í alþjóðlegt samhengi og fjallaði m.a. um mikilvægi þess að íbúar jarðar taki höndum saman um að bæta umgengni sína við náttúruna. Hann hrósaði Snæfellingum í hástert fyrir frumkvæði sitt til framfara í umhverfismálum. 

Menja von Schmalensee, fyrrum varaformaður Framkvæmdaráðs Snæfellsness, límir nýja merkið á skiltið við Haffjarðará aðfaranótt 8. júní. Merkið er tákn um að Snæfellsnes hafi hlotið vottun Green Globe samtakanna.

9. júní 2008

Bláfánanum flaggað í sjötta sinn í Stykkishólmi

Fimmtudaginn 5. júní fékk Stykkishólmshöfn afhentan Bláfánann í sjötta sinn. Það var Sigrún Pálsdóttir verkefnisstjóri Bláfánans sem afhenti Erlu bæjarstjóra fánann. Í ár er Bláfáninn veittur í 31 Evrópulandi og í 6 löndum utan Evrópu. Bláfánann hljóta þeir einir sem leggja sig fram um að bæta gæði og þjónustu stranda og smábátahafna og stuðla að verndun umhverfis. Bláfáninn er tákn um að umhverfismál, öryggismál og umhverfisfræðslumál eru í hávegum höfð hjá handhöfum fánans.

Erla Friðriksdóttir, bæjarstjóri, og Sigrún Pálsdóttir með fána ársins 2008.     

Ljósmynd: Arna Sædal Andrésdóttir

4. júní 2008

Fyrst í Evrópu – Fjórðu í heiminum

Sveitarfélögin á Snæfellsnesi, Eyja- og Miklaholtshreppur, Grundarfjarðarbær, Helgafellssveit, Snæfellsbær og Stykkishólmsbær auk Þjóðgarðsins Snæfellsjökuls, taka þann 8. júní formlega á móti vottun frá alþjóðlegu umhverfisvottunarsamtökunum Green Globe.

Þetta er merkur áfangi í sjálfbærnisögu Íslands, því sveitarfélögin eru þau fyrstu í Evrópu til að hljóta vottun fyrir stefnu og framkvæmd í sjálfbærri þróun umhverfis- og samfélagsmála og fjórða svæðið í heiminum til að ná slíkum árangri.

Eiginlegt vinnuferli hófst árið 2003, en frá þeim tíma hafa orðið geysilegar breytingar á umhverfisstjórnun sveitarfélaganna.  Allir leikskólar og fimm grunnskólar af sjö á Snæfellsnesi hafa fengið Grænfánann, hafnirnar í Stykkishólmi og á Arnarstapa eru komnar með Bláfánann en báðir fánarnir undirstrika aukna umhverfisstjórnun og sjálfbærni í rekstri viðkomandi staða.

Úrgangsmál hafa verið stórlega bætt og í öllum sveitarfélögum er nú tekið á móti flokkuðum úrgangi og flest heimili eiga þess kost að vera með endurvinnslutunnu. Stefna sveitarfélaganna er mun skýrari og markvissari í öllum rekstri, innri verkferlar hafa verið bættir og innkaup beinast að umhverfisvottuðum vörum, auk þess sem ýmis öryggismál hafa verið endurskoðuð og yfirfarin.

Vottunarferlið hefur því eflt og skerpt ýmsar áherslur í rekstri sveitarfélaganna og gert þau enn betri fyrir íbúana, um leið og meira tillit er tekið til náttúrunnar. Þjóðgarðurinn Snæfellsjökull er aðili að vottuninni og því fyrsti þjóðgarðurinn á Íslandi til að hljóta umhverfisvottun. Á Snæfellsnesi eru jafnframt fleiri vernduð svæði sem falla undir hið vottaða svæði.

Vottun Green Globe verður endurnýjuð árlega og sveitarfélögin setja sér jafnframt markmið um áframhaldandi árlegar úrbætur í rekstri sínum.

Kjartan Bollason úttektaraðili Green Globe á Íslandi mun afhenda forsvarsmönnum sveitarfélaganna og þjóðgarðsverði viðurkenningar um vottunina í Fjölbrautaskóla Snæfellinga í Grundarfirði sunnudaginn 8. júní kl. 14:30. Viðstaddir þessa tímamótaathöfn verða meðal annars forseti Íslands, forseti Alþingis og fyrrverandi samgönguráðherra, alþingismenn og aðrir góðir gestir. Allir eru velkomnir.

Dagskrána má nálgast hér.

14. apríl 2008

Green Globe úttekt á Snæfellsnesi

Þann 7.- 9. apríl sl. voru úttektaraðilar frá Green Globe samtökunum staddir á Snæfellsnesi.  Þeir Kjartan Bollason frá Háskólanum á Hólum og Stan Rodgers frá Ástralíu komu til að meta hvort starfsemi sveitarfélaganna fimm og Þjóðgarðsins Snæfellsjökuls sé í samræmi við markmið sjálfbærrar þróunar. Vænta má nánari frétta af vottun Snæfellsness á næstu vikum.

Stefán Gíslason umhverfisstjórnunarfræðingur hjá UMÍS í Borgarnesi, hefur verið einn aðal ráðgjafi verkefnisins frá upphafi. Hann hefur sett inn á heimasíðu sína skemmtilega frásögn af úttektarvinnunni. Fréttina má finna hér.

14. febrúar 2008

Krílakot flaggar Grænfánanum

Mánudaginn 4. febrúar rann stóri dagurinn upp á Krílakoti þegar Rósa Erlendsdóttir deildarstjóri í Lýsuhólsskóla og Þórunn Sigþórsdóttir umhverfisfulltrúi Snæfellsness komu og afhentu skólanum Grænfánann fyrir hönd Landverndar. Hermína K. Lárusdóttir verkefnisstjóri  veitti fánanum viðtöku og Kristinn Jónasson bæjarstjóri í Snæfellsbæ hjálpaði krökkunum að draga fánann að hún. Mun fáninn fá að blakta þar næstu tvö árin en Grænfánanum er flaggað til tveggja ára í senn.  Kríuból er sjötti skólinn á Snæfellsnesi sem fær slíka viðurkenningu fyrir vel unnin störf að umhverfismálum.

Ljósmyndir: Þórunn Sigþórsdóttir

5. febrúar 2008

Hólmarar stíga stórt skref í sorpmálum

Íbúar Stykkishólms eru byrjaðir að flokka sorp sitt mun ítarlegar en íbúar annarra sveitarfélaga. Dagana 25. og 26. janúar dreifðu starfsmenn Íslenska Gámafélagsins flokkunartunnum til íbúanna og eru nú komnar þrjár tunnur við hvert hús í bænum:

• Græn tunna sem ætluð er fyrir endurvinnanlegan úrgang svo sem pappa, pappír, fernur, plast og minni málmhluti.

• Brún tunna undir lífrænan úrgang.

• Grá tunna fyrir almennan úrgang sem ekki er hægt að endurvinna.

Starfsmenn Íslenska gámafélagsins og forsvarsmenn sveitarfélagsins hafa kynnt flokkunina á fundum. Í kjölfarið á þeim gengu starfsmenn fyrirtækisins í hvert hús í bænum til frekari kynningar og til svara þeim spurningum sem brunnu á bæjarbúum varðandi verkefnið.  Flokkunin kallar á nýjar lausnir bæði innan dyra og utan, t.d. varðandi staðsetningu sorpíláta. Íbúar Stykkishólms tóku þessum heimsóknum vel og virðast flestir jákvæðir gagnvart þessum breytingum.

Stykkishólmur er fyrst allra sveitarfélaga á landinu sem gerir svona átak. Með því er stigið stórt skref til minnkunar þess úrgangs sem fer frá Stykkishólmi til urðunar í Fíflholtum en sveitarfélagið hefur að undanförnu sent 55 tonn af sorpi á mánuði til urðunar eða tæp 700 tonn á ári. Markmiðið er að minnka umfang úrgangs sem fer til urðunar um 60% og allt að 80% á innan við þremur árum.

Græna tunnan Ljósmyndir: Íris Huld Sigurbjörnsdóttir

Gretar D. Pálsson, forseti bæjarstjórnar tekur við fyrstu tunnunum

27. nóvember 2007

Laugagerðisskóli flaggar Grænfánanum í annað sinn

Þann 8. nóvember sl. var Grænfáninn dreginn að hún í Laugagerðisskóla í annað sinn. Í tilefni dagsins höfðu krakkarnir sett upp leikþætti fyrir gesti og aðra nemendur og hópur nemenda söng "Ísland er land þitt" eftir Magnús Þór Sigmundsson. Atriðum nemenda lauk með ljúfum blokkflautu- og gítartónum. Áslaug Sigvaldadóttir, verkefnisstjóri Grænfánans í Laugagerðisskóla, og Kristín Björk Guðmundsdóttir, skólastjóri, tóku við alþjóðlegu skírteini til marks um góðan árangur í umhverfismennt í skólanum og nemendur í umhverfisnefnd skólans tóku við sjálfum Grænfánanum. Gengið var fylktu liði út að fánastönginni þar sem fáninn var dreginn að hún. Á eftir var fagnað yfir gómsætum vöfflum.

16. nóvember 2007

Skrifað var undir tímamótasamning í gær

Í gær var undirritaður samningur á milli Stykkishólmsbæjar og Íslenska gámafélagsins um flokkun sorps og moltugerð í sveitarfélaginu. Með þessum samningi hefur Stykkishólmsbær fyrst allra sveitarfélaga á Íslandi tekið skrefið til fulls í flokkun sorps. Mun flokkun á sorpi og moltugerð lífræns úrgangs frá öllum heimilum bæjarfélagsins hefjast í janúar á næsta ári.

Íslenska gámafélagið mun sjá um framkvæmd verkefnisins og fræðslu til bæjarbúa. Þeir sem ekki komust á fræðslufundinn í gærkveldi þurfa ekki að örvænta því starfsmenn Íslenska gámafélagsins koma til með að ganga í hvert hús í bænum og fara yfir málin með bæjarbúum og jafnframt aðstoða við að finna lausnir og svör á þeim vandamálum og spurningum sem upp kunna að koma t.d. eins og hvar sé best að staðsetja tunnurnar þrjár. Til viðbótar við gráu tunnuna sem fyrir er fær hvert heimili Grænu tunnuna sem ætluð er fyrir endurvinnanlegan úrgang svo sem pappa, pappír, fernur, plast og minni málmhluti. Innihald grænu tunnunnar verður síðan flokkað frekar og sent til endurvinnslu. Einnig fær hvert heimili brúna tunnu undir lífrænan úrgang heimilisins. Íslenska Gámafélagið mun síðan losa brúnu tunnurnar og umbreyta lífræna úrganginum í næringarríka moltu. Moltan verður síðan notuð í bæjarfélaginu við uppgræðslu og gróðursetningu.

Markmið verkefnisins er að minnka umfang almenns sorps sem fer til urðunar að minnsta kosti um 60%.

Frétt af www.stykkisholmur.is/ 

Myndir: Þórunn Sveinbjarnardóttir umhverfisráðherra, Erla Friðriksdóttir bæjarstjóri, Jón Þórir Frantzson framkvæmdastjóri Íslenska gámafélagsins og Gretar D. Pálsson forseti bæjarstjórnar.  Guðmundur Andrésson tók myndirnar.

8. nóvember 2007

Leikskólinn Sólvellir fær afhentan Grænfánann

13. september 2007

Frétt af www.snb.is

3. september 2007

Færeyskt Staðardagskrárfólk í heimsókn

Síðastliðinn fimmtudag kom 30 manna hópur frá Færeyjum í heimsókn á Snæfellsnes til að kynna sér samstarf sveitarfélaganna um Green Globe vottunarferlið. Í Stykkishólmi fékk hópurinn kynningu á verkefninu. Heimsóknin var liður í tveggja daga Íslandsferð hópsins. 

Erla Friðriksdóttir, bæjarstjóri Stykkishólmsbæjar, tók á móti þeim í Vatnasafninu en síðan skoðuðu þeir höfnina sem flaggar nú Bláfánanum fimmta árið í röð. Þórunn Sigþórsdóttir umhverfisfulltrúi fræddi þá um samstarf sveitarfélaganna og stöðu þeirra í vottunarferli Green Globe. Í dagslok var svo slegið á léttari strengi og farin kynnisferð um bæinn þar sem Eyþór Benediktsson sagði frá sögu Stykkishólms. Endapunkturinn var svo ljúffengur kvöldverður á Narfeyrarstofu. 

Auk heimsóknarinnar í Stykkishólm kynnti færeyski hópurinn sér m.a. meðhöndlun úrgangs á höfuðborgarsvæðinu, vistvænan leikskóla á Kjalarnesi, Landsskrifstofu Staðardagskrár 21 í Borgarnesi og vistvænan grunnskóla á Lýsuhóli.

Áhugi Færeyinga á Staðardagskrá 21 er mjög mikill ef marka má góða þátttöku í ferðinni. Nánari upplýsingar um Staðardagskrárstarfið í Færeyjum er að finna á vefsíðum „Føroya Kommunufelag,” nánar tiltekið á slóðinni http://www.fkf.fo/agenda.asp?Cmd=31.

31. maí 2007

Grænfáninn dreginn að húni við Lýsuhólsskóla

Í gær, þann 30. maí, var nýr Grænfáni dreginn að húni við Grunnskóla Snæfellsbæjar, Lýsuhólsskóla. Þetta er í þriðja sinn sem skólinn fær þessa viðurkenningu en Grænfáni er fjölþjóðleg viðurkenning fyrir gott umhverfisstarf í skólum. Landvernd heldur utan um verkefnið á Íslandi og fulltrúar Landverndar afhentu fánann.

Í tilefni dagsins var haldin hátíð þar sem nemendur fluttu leik- og söngþátt um sólkerfið okkar, sögðu frá umhverfisstarfi í skólanum og sýndu stuttmynd sem gerð var á skólaárinu og byggir á fyrstu sögulegu heimildum um Lýsuhólslaug.