Upphaf EarthCheck á Snæfellsnesi

Á ferðamálaráðstefnu í Stykkishólmi árið 2002 hélt Reg Easy frá Green Globe skrifstofunni í Englandi kynningarfyrirlestur um hag fyrirtækja af vottun og þau jákvæðu áhrif sem hún hefði bæði markaðslega og fjárhagslega á rekstur fyrirtækja. Jafnframt ræddi hann um ábyrgð fyrirtækja í ferðaþjónustu gagnvart sinni helstu auðlind, náttúrunni. Í beinu framhaldi af þessari ráðstefnu spunnust umræður um það hvort hægt væri að votta landshluta og þá hvernig farið væri að því. Guðrún og Guðlaugur Bergmann komu fljótlega á fundi með Reg Easy og þáverandi umhverfisráðherra, Siv Friðleifsdóttur. Fundinn sátu einni Jóni Birgi Jónssyni, ráðuneytisstjóri í Samgönguráðuneytinu, og Magnúsi Oddsson, ferðamálastjóri.

Á fundinum kom fram mikill áhugi ofangreindra aðila á hugmyndinni um vottun landshluta. Fram kom að sennilega væri Snæfellsnes best til þessa verkefnis fallið sökum þess hversu afmarkað svæðið væri en byði þó upp á góða tengivegi og þannig væri greið leið til hringaksturs um svæðið auk þess sem tenginar fengjum sem fjallvegum um Nesið. Ljóst var á þessum fundi að Umhverfisráðuneytið myndi ekki styrkja verkefnið fjárhagslega. Guðrún og Guðlaugur Bergmann létu það ekki stöðva sig og héldu ótrauð áfram. Boðuðu þau til fundar með sveitarstjórum Snæfellsbæjar, Grundarfjarðarbæjar og Stykkishólmsbæjar nokkrum vikum síðar og kynntu þeim hugmynd sína um vottun Snæfellsness. Vel var tekið í hugmyndina og tekin var sú ákvörðun um að skoða málið frekar og leita um leið eftir þátttöku Helgafellssveitar, Eyja- og Miklaholtshrepps og jafnvel Kolbeinstaðahrepps í þessu verkefni til þess að það næði yfir Snæfellsnes allt.

Verkefnið var þróað áfram næstu mánuði og vorið 2003 gengu Samgönguráðuneytið og Iðnaðarráðuneytið fram fyrir skjöldu og ákváðu að styrkja vottunarverkefnið á Snæfellsnesi með 8 milljóna króna styrk úr Byggðasjóði. Var litið svo á að um einstakt frumkvöðlaverkefni væri að ræða og að sú reynsla sem yrði til á Snæfellsnesi myndi geta nýst öðrum landshlutum í framtíðinni. Sveitarfélögin fimm á Snæfellsnesi, Eyja- og Miklaholtshreppur, Helgafellssveit, Grundarfjarðarbær, Snæfellsbær og Stykkishólmsbær, og Þjóðgarðurinn Snæfellsjökull gengu formlega inn í Green Globe ferlið í maí árið 2003. Fyrsti vinnufundur verkefnisins var haldinn þann 20. október 2003 og hófst þá vinna að mótun framtíðarsýnar og stefnumótun sjálfbærs samfélags á Snæfellsnesi.

Undirbúningsferlið fyrir umhverfisvottun Green Globe krafðist mikillar vinnu af hálfu sveitarfélaganna þar sem settar eru strangar kröfur sem sveitarfélögin þurfti að standast í undirbúningsferlinu fyrir vottunina. Viðmiðum Green Globe var fyrst náð í október 2004 og svo aftur árin 2005, 2006 og 2007.

Það var loks þann 8. júní 2008 sem Snæfellsnes hlaut umhverfisvottun Green Globe við hátíðlega athöfn að viðstöddum forseta Íslands, þingmönnum, sveitarstjórnarfólki og fjölda gesta. Um var að ræða stórmerkan áfanga sem hefur vakið verðskuldaða athygli innan lands sem utan þar sem sveitarfélögin á Snæfellsnesi eru þau fyrstu í Evrópu til þess að hljóta slíka vottun og fjórða svæðið í heiminum til þess að ná slíkum árangri. Til þess að viðhalda vottun er stöðugra úrbóta í umhverfis- og samfélagsmálum krafist og árlega fer fram úttekt á svæðinu þar sem metið er hvort endurnýjun vottunar hlýst. Bág fjárhagsstaða auk breytinga innan vottunarsamtakanna erlendis varð til þess að engin úttekt var gerð á svæðinu árið 2009. Í maí 2010 kom til landsins ástralskur úttektaraðili sem dvaldi á Snæfellsnesi í tvo daga og mat árangur síðustu ára. Leiddu niðurstöður hennar til endurnýjunar umhverfisvottunar Snæfellsness 2010 og nú undir merkjum EarthCheck.